שופטים ג - מאמרים
- תמרים והשמנה
- אהוד בן גרא - אייזנברג
- מרד אהוד בן גרא במואב - ההכנות, הארגון ופרטי הביצוע
- מרד אהוד בן גרא במואב - ספונטאני ולא מתוכנן
- פרשת אהוד בן גרא
1. ואלה הגוים אשר הניח יהוה לנסות בם את-ישראל את כל-אשר לא-ידעו את כל-מלחמות כנען. ע
2. רק למען דעת דרות בני-ישראל ללמדם מלחמה רק אשר-לפנים לא ידעום. ע
3. חמשת סרני פלשתים וכל-הכנעני והצידני והחוי ישב הר הלבנון מהר בעל חרמון עד לבוא חמת. ע
4. ויהיו לנסות בם את-ישראל לדעת הישמעו את-מצות יהוה אשר-צוה את-אבותם ביד-משה. ע
5. ובני ישראל ישבו בקרב הכנעני החתי והאמרי והפרזי והחוי והיבוסי. ע
6. ויקחו את-בנותיהם להם לנשים ואת-בנותיהם נתנו לבניהם ויעבדו את-אלהיהם. ע
7. ויעשו בני-ישראל את-הרע בעיני יהוה וישכחו את-יהוה אלהיהם ויעבדו את-הבעלים ואת-האשרות. ע
8. ויחר-אף יהוה בישראל וימכרם ביד כושן רשעתים מלך ארם נהרים ויעבדו בני-ישראל את-כושן רשעתים שמנה שנים. ע
9. ויזעקו בני-ישראל אל-יהוה ויקם יהוה מושיע לבני ישראל ויושיעם את עתניאל בן-קנז אחי כלב הקטן ממנו. ע
10. ותהי עליו רוח-יהוה וישפט את-ישראל ויצא למלחמה ויתן יהוה בידו את-כושן רשעתים מלך ארם ותעז ידו על כושן רשעתים. ע
11. ותשקט הארץ ארבעים שנה וימת עתניאל בן-קנז. ע
12. ויספו בני ישראל לעשות הרע בעיני יהוה ויחזק יהוה את-עגלון מלך-מואב על-ישראל על כי-עשו את-הרע בעיני יהוה. ע
13. ויאסף אליו את-בני עמון ועמלק וילך ויך את-ישראל ויירשו את-עיר התמרים. ע
14. ויעבדו בני-ישראל את-עגלון מלך-מואב שמונה עשרה שנה. ע
15. ויזעקו בני-ישראל אל-יהוה ויקם יהוה להם מושיע את-אהוד בן-גרא בן-הימיני איש אטר יד-ימינו וישלחו בני-ישראל בידו מנחה לעגלון מלך מואב. ע
16. ויעש לו אהוד חרב ולה שני פיות גמד ארכה ויחגר אותה מתחת למדיו על ירך ימינו. ע
17. ויקרב את-המנחה לעגלון מלך מואב ועגלון איש בריא מאד. ע
18. ויהי כאשר כלה להקריב את-המנחה וישלח את-העם נשאי המנחה. ע
19. והוא שב מן-הפסילים אשר את-הגלגל ויאמר דבר-סתר לי אליך המלך ויאמר הס ויצאו מעליו כל-העמדים עליו. ע
20. ואהוד בא אליו והוא-ישב בעלית המקרה אשר-לו לבדו ויאמר אהוד דבר-אלהים לי אליך ויקם מעל הכסא. ע
21. וישלח אהוד את-יד שמאלו ויקח את-החרב מעל ירך ימינו ויתקעה בבטנו. ע
22. ויבא גם-הנצב אחר הלהב ויסגר החלב בעד הלהב כי לא שלף החרב מבטנו ויצא הפרשדנה. ע
23. ויצא אהוד המסדרונה ויסגר דלתות העליה בעדו ונעל. ע
24. והוא יצא ועבדיו באו ויראו והנה דלתות העליה נעלות ויאמרו אך מסיך הוא את-רגליו בחדר המקרה. ע
25. ויחילו עד-בוש והנה איננו פתח דלתות העליה ויקחו את-המפתח ויפתחו והנה אדניהם נפל ארצה מת. ע
26. ואהוד נמלט עד התמהמהם והוא עבר את-הפסילים וימלט השעירתה. ע
27. ויהי בבואו ויתקע בשופר בהר אפרים וירדו עמו בני-ישראל מן-ההר והוא לפניהם. ע
28. ויאמר אלהם רדפו אחרי כי-נתן יהוה את-איביכם את-מואב בידכם וירדו אחריו וילכדו את-מעברות הירדן למואב ולא-נתנו איש לעבר. ע
29. ויכו את-מואב בעת ההיא כעשרת אלפים איש כל-שמן וכל-איש חיל ולא נמלט איש. ע
30. ותכנע מואב ביום ההוא תחת יד ישראל ותשקט הארץ שמונים שנה. ע
31. ואחריו היה שמגר בן-ענת ויך את-פלשתים שש-מאות איש במלמד הבקר וישע גם-הוא את-ישראל. ע
לעמוד זה יש כתובת קצרה: t0703
הטקסט התנ"כי בעמוד זה הועתק מהטרנסליטרציה של סטיב גרוס - Steve Gross - מאתר "שמש".