תהילים עח - מאמרים
1. משכיל לאסף האזינה עמי תורתי הטו אזנכם לאמרי-פי. ע
2. אפתחה במשל פי אביעה חידות מני-קדם. ע
3. אשר שמענו ונדעם ואבותינו ספרו-לנו. ע
4. לא נכחד מבניהם לדור אחרון מספרים תהלות יהוה ועזוזו ונפלאותיו אשר עשה. ע
5. ויקם עדות ביעקב ותורה שם בישראל אשר צוה את-אבותינו להודיעם לבניהם. ע
6. למען ידעו דור אחרון בנים יולדו יקמו ויספרו לבניהם. ע
7. וישימו באלהים כסלם ולא ישכחו מעללי-אל ומצותיו ינצרו. ע
8. ולא יהיו כאבותם דור סורר ומרה דור לא-הכין לבו ולא-נאמנה את-אל רוחו. ע
9. בני-אפרים נושקי רומי-קשת הפכו ביום קרב. ע
10. לא שמרו ברית אלהים ובתורתו מאנו ללכת. ע
11. וישכחו עלילותיו ונפלאותיו אשר הראם. ע
12. נגד אבותם עשה פלא בארץ מצרים שדה-צען. ע
13. בקע ים ויעבירם ויצב-מים כמו-נד. ע
14. וינחם בענן יומם וכל-הלילה באור אש. ע
15. יבקע צרים במדבר וישק כתהמות רבה. ע
16. ויוצא נוזלים מסלע ויורד כנהרות מים. ע
17. ויוסיפו עוד לחטא-לו למרות עליון בציה. ע
18. וינסו-אל בלבבם לשאל-אכל לנפשם. ע
19. וידברו באלהים אמרו היוכל אל לערך שלחן במדבר. ע
20. הן הכה-צור ויזובו מים ונחלים ישטפו הגם-לחם יוכל תת אם-יכין שאר לעמו. ע
21. לכן שמע יהוה ויתעבר ואש נשקה ביעקב וגם-אף עלה בישראל. ע
22. כי לא האמינו באלהים ולא בטחו בישועתו. ע
23. ויצו שחקים ממעל ודלתי שמים פתח. ע
24. וימטר עליהם מן לאכל ודגן-שמים נתן למו. ע
25. לחם אבירים אכל איש צידה שלח להם לשבע. ע
26. יסע קדים בשמים וינהג בעזו תימן. ע
27. וימטר עליהם כעפר שאר וכחול ימים עוף כנף. ע
28. ויפל בקרב מחנהו סביב למשכנתיו. ע
29. ויאכלו וישבעו מאד ותאותם יבא להם. ע
30. לא-זרו מתאותם עוד אכלם בפיהם. ע
31. ואף אלהים עלה בהם ויהרג במשמניהם ובחורי ישראל הכריע. ע
32. בכל-זאת חטאו-עוד ולא-האמינו בנפלאותיו. ע
33. ויכל-בהבל ימיהם ושנותם בבהלה. ע
34. אם-הרגם ודרשוהו ושבו ושחרו-אל. ע
35. ויזכרו כי-אלהים צורם ואל עליון גאלם. ע
36. ויפתוהו בפיהם ובלשונם יכזבו-לו. ע
37. ולבם לא-נכון עמו ולא נאמנו בבריתו. ע
38. והוא רחום יכפר עון ולא-ישחית והרבה להשיב אפו ולא-יעיר כל-חמתו. ע
39. ויזכר כי-בשר המה רוח הולך ולא ישוב. ע
40. כמה ימרוהו במדבר יעציבוהו בישימון. ע
41. וישובו וינסו אל וקדוש ישראל התוו. ע
42. לא-זכרו את-ידו יום אשר-פדם מני-צר. ע
43. אשר-שם במצרים אתותיו ומופתיו בשדה-צען. ע
44. ויהפך לדם יאריהם ונזליהם בל-ישתיון. ע
45. ישלח בהם ערב ויאכלם וצפרדע ותשחיתם. ע
46. ויתן לחסיל יבולם ויגיעם לארבה. ע
47. יהרג בברד גפנם ושקמותם בחנמל. ע
48. ויסגר לברד בעירם ומקניהם לרשפים. ע
49. ישלח-בם חרון אפו עברה וזעם וצרה משלחת מלאכי רעים. ע
50. יפלס נתיב לאפו לא-חשך ממות נפשם וחיתם לדבר הסגיר. ע
51. ויך כל-בכור במצרים ראשית אונים באהלי-חם. ע
52. ויסע כצאן עמו וינהגם כעדר במדבר. ע
53. וינחם לבטח ולא פחדו ואת-אויביהם כסה הים. ע
54. ויביאם אל-גבול קדשו הר-זה קנתה ימינו. ע
55. ויגרש מפניהם גוים ויפילם בחבל נחלה וישכן באהליהם שבטי ישראל. ע
56. וינסו וימרו את-אלהים עליון ועדותיו לא שמרו. ע
57. ויסגו ויבגדו כאבותם נהפכו כקשת רמיה. ע
58. ויכעיסוהו בבמותם ובפסיליהם יקניאוהו. ע
59. שמע אלהים ויתעבר וימאס מאד בישראל. ע
60. ויטש משכן שלו אהל שכן באדם. ע
61. ויתן לשבי עזו ותפארתו ביד-צר. ע
62. ויסגר לחרב עמו ובנחלתו התעבר. ע
63. בחוריו אכלה-אש ובתולתיו לא הוללו. ע
64. כהניו בחרב נפלו ואלמנתיו לא תבכינה. ע
65. ויקץ כישן אדני כגבור מתרונן מיין. ע
66. ויך-צריו אחור חרפת עולם נתן למו. ע
67. וימאס באהל יוסף ובשבט אפרים לא בחר. ע
68. ויבחר את-שבט יהודה את-הר ציון אשר אהב. ע
69. ויבן כמו-רמים מקדשו כארץ יסדה לעולם. ע
70. ויבחר בדוד עבדו ויקחהו ממכלאת צאן. ע
71. מאחר עלות הביאו לרעות ביעקב עמו ובישראל נחלתו. ע
72. וירעם כתם לבבו ובתבונות כפיו ינחם. ע
לעמוד זה יש כתובת קצרה: t2678
הטקסט התנ"כי בעמוד זה הועתק מהטרנסליטרציה של סטיב גרוס - Steve Gross - מאתר "שמש".